شرکة Apple قرّبات توقّع واحد الصّفقة کبيرة بزّاف مع Google غادي تخلّص فيها تقريبا مليار دولار کل عام باش تستعمل التکنولوجيا ديال الذکاء الاصطناعي "Gemini" اللي کايديرو Google، و هادشي باش يحسّنو Siri و يخليوه ذکي کتر و حسن من دابا.
على حساب الخبار اللي خرجات من Bloomberg و الناس اللي عارفين شنو کايدور، الشرکات بجوج راهم کايکملو التفاوض على هاد الاتفاق اللي غادي يعطي لـApple الحق باش تستعمل موديل Gemini اللي فيه 1.2 تريليون معامل. يعني هاد الموديل قوي ب ثمنية د المرات من الموديل اللي کاتستعمل Apple دابا و اللي فيه غير 150 مليار معامل.
Siri الجديد اللي غادي يخدم ب Gemini، راهم کايݣولو غادي يخرج فالربيع ديال 2026، مع التحديث ديال iOS 26.4. و غادي يستعملو التکنولوجيا ديال Google خصوصا فالتلخيص و التخطيط، يعني Siri غادي يولي يفهم المعلومات مزيان ويقدر يدير الحوايج المعقدة بطريقة حسن من دابا.
و المهم فالقضية، Apple جربات موديلات آخرين قبل ما تختار Google. کانت کاتفاوض مع OpenAI (اللي کايديرو ChatGPT) و مع Anthropic، ولکن فاللخر ختارت Gemini حيت الثمن کان مناسب و الموديل قوي بزاف. شرکة Anthropic مثلا طلبات أکثر من مليار ونص دولار فالعام!
غير هو Apple ماشي ناوية تبقى ديما تابعة لـGoogle. الشرکة راها خدامة على موديل ديالها بقوة تريليون معامل، و اللي يقدر يکون واجد فـ2026، و ديک الساعة يقدرو يستاغناو على Google فخطرة.
و بالنسبة للخصوصية، Gemini غادي يخدم على السيرڤرات ديال Apple (اللي کايسميوهوم Private Cloud Compute)، يعني المعلومات ديال المستخدمين ماغاديش توصل لـGoogle، و هادشي مهم حيت Apple ديما کاتݣول باللي الخصوصية أولوية عندها.
الناس فالسوق المالي فرحانين بهاد الخبار، و الأسهم ديال Apple و Google طلعو شوية منين خرجات هاد الخبار. و هادشي کايبين باللي المستثمرين شايفين هاد الصفقة مزيانة للشرکات بجوج.